الأورطة

المقادير :
12ورقة ملسوقة و 150غ زبدة ذائبة و 200غ لوز محمر و مرحى و 200غ بوفريوة محمرة و مرحية و مغرفتين كبار ماء ورد
للشحور :
كاس ماء و كاسين سكر و عصير نصف قارصة و مغرفة كبيرة ماء ورد.
للزينة :
لوز مرحى و 50غ فستق و 50غ بندق
الطريقة :
فى وعاء اتحضر الشحور اتحط السكر و الماء و عصير القارص يغليو دوب يعقاد شوية اطفى عليه و اتزيدو مغرفة ماء الورد وتاخذ الطبق الى ماش اتحضر فيه اتنجم تعمل طبق مربع او مدور كيما اتحب و تدهن الطبق بالزبدة و تفرش طبقة ملسوقة و تدهن بالزبدة تعمل ثلاثة طبقات كل مرة تدهن بالزبدة و بعد تاخذ الفاكية اللوز و البوفريوة و اتزيدهم اربعة مغارف شحور كبار و اتخلط و اتصب الخليط فى الطبق و تفرشو بالباهى و بعد اترش عليه ماء الورد و اتعاود تعمل طبقة ملسوقة و تدهن بالزبدة لين اتكمل الملسوقة و ادخلها للفور 180درجة دوب تحمار اتخرجها و اتصب عليها الشحور و اطفى الفور و ادخلها ساعة فى الفور ترتاح (الفور طافى بالطبيعة) و بعد ما ترتاح اتزينها باللوز و الفستق و البندق و اتقصها كيما اتحب و بالشفاء

#روسات_الشاف_أمين

التعليقات مغلقة.