ڤرن غزال بماء الزهر

المقادير :

125غ زبدة و زوز مغارف كبار سكر محور و فنجان زيت و فنجان ماء زهر و رشةً ملح و مغرفة صغيرة سكر فانيليا و مغرفة صغيرة خميرة ڤاطو و فارينة حسب الحاجة لين تتلم العجينة
و للحشو :
150غ لوز محمر و مرحى و 50غ جلجلان محمر و مرحى و زوز مغارف كبار سكر عادىً و مغرفة سكر فانيليا و ماء زهر لين يتلم و يولى عجينة
و للزينة :
لوز مهروش و سكر محور

الطريقة :

فى صحفة اتحط الزبدة الى اتكون طرية بحرارة الغرفة و اتزيدها السكر المحور و السكر الفانيليا و رشةً الملح و ماء الزهر و الزيت و اتركض الكل لين يتجانسو و بعد اتزيد الفارينة و الخميرة و اتلم العجينة لمان من غير ما تعجن كيما بات السبلاي و لازم تقعد العجينة طرية و بعد اتخليها ترتاح و اتحضر الحشو اتخلط مكونات الحشو الكل مع بعضهم لين اتولى عجينة متماسكة و بعد العجينة الى خليتها ترتاح اتقسمها كوريات صغار و تاخذ ساشاي و الا ورق الزبدة و اتحل بالقلقال كل كعبورة بالطول و اتحط الحشو و اتسكر فى شكل ڤرن و اتحط فى الطبق اتنجم اتخليهم هكك و بعد ما يطيبو اتزينهم و اتنجم تدهنهم بأبيض عظمة و اترش عليهم اللوز المهروش و بعد ادخلهم للفور 180درجة 25 دقيقة لازم دوب يحمارو شوية و اتخرجهم و بعد الى موش مزينين باللوز اتزينهم بعد ما اتخرجهم من الفور اتخليهم يبردو و بعد تاخد صحفة اتحط فيها ماء زهر و مغرفة سكر محور و اتغطس الكعبة و بعد اتغطسها فى السكر المحور بالباهى و اتنجم زادة اتزين بطريقة اخرى تاخذ الكعبة تدهنها بمعجون مسخن شوية و بعد اترش عليها لوز مهروش و الا noix de coco محمر فى الفور و بالشفاء

#روسات_الشاف_امين

التعليقات مغلقة.